Si Pangka: Mak Angku, sambah dipulangkan bakek Mak Angku.
Si Alek: Kapado Allah.
Si Pangka: Sungguahpun Mak Angku surang nan disabuik namo dipanggiakan gala, rapeklah ka sagalo sidang mujilih nan ado, nan tahampa di ateh lantai, nan tasungkuik di bawah atok, nan balirik salingka dindiang, ketek indak ka disabuikkan namo, gadang indak ka dipanggiakan gala. Namun, tembak nak baalamaik, iyo ka bakek Mak Angku Ambo mamulangkan sambah.
Si Alek: Kapado kito basamo.
Si Pangka: Adopun sambah nan kadipulangkan bakek Mak Angku; alah sabarih jamba nan tahidang, dari pangka sampai ka ujuang, dari tangah lalu ka tapi, nan manjamba ka ruang gadang. Manuruik kato si Rajo Janang; ibaraik basukek rasolah panuah, umpamo babilang rasolah cukuik. Tapi samantangpun baitu, kok ado lirik nan talampau, kok ado kurang nan ka ditukuak, senteang nan ka dibilai. Layangkanlah dek Mak Angku pandangan ka nan jauh, tukuikkanlah ka nan ampiang, samantaro Janang lai tagak juo. Bak pituah Mak Angku juo; tuan Katik mangarang bandua, takarang di banang bulang, sungguahpun cukuik dari dapua, tibo di ujuang antah kurang. Sakian Mak Angku.
Si Alek: (Jawek Versi 1) Sapanjang panitahan Sutan tadi, tantangan juadah nan ka tangah; alah kami paiyo patidokan jo nan tuo sabalah ka ujuang, baalah kato baliau, tantangan jamba nanko; ibaraik bungo lah jadi putiak, putiak lah suko jadi buah, buah lah masak ranum pulo, tinggi bak raso kadijuluak, randah bak raso kadijangkau, dijuluak bak raso ka rasan dek pisau, dijangkau izin nan balun buliah. Jadi, tapaso dinanti jatuah dari tampuak mah Katik. Sekian sambah di pulangkan ka bakek Angku.
Si Alek: (Jawek Versi 2) Sapanjang panitahan Sutan tadi, tantangan juadah nan ka tangah; indak ado kurang nan makanan tukuak, sentiang nan makanan bilai. Tapi, sungguahpun baitu, ibaraik urang manabang kayu, dek Sutan nan di pangka, tabanglah dek Sutan dari sinan, nak kami sisiak dari siko.
Si Pangka: (Baleh Versi 1) Mandangan pituah Mak Angku, sanang rasonyo kiro-kiro. Baa tu nyo kini; disikek luluak nan lunak, ditanam padi di sawah, masak dituai basamo-samo. Jiko sifaik nan Mak Angku mintak, nak kami mulai jo bismillah, turuik dek Mak Angku basamo-samo.
Si Pangka: (Baleh Versi 2) Mandangan pituah Mak Angku, sanang rasonyo kiro-kiro. Baa tu nyo kini; pulau aia Lubuak Kilangan, pandan sapanjang muaronyo, ambiak aia basuahlah tangan, rasaki samo-samo kito tarimo.
Demikian pembahasan tentang Pasambahan Makan Versi 2 - Bahasa dan Sastra Minangkabau (BSM). Semoga dapat menambah pemahamannya tentang Minangkabau,. Kritik dan saran melalui kolom komentar dibawah. Save dan share artikel ini untuk berbagi pengetahuan dengan klik ikon dibawah ini.
Social Media