Versi: Asuhan Ajo Chan kombinasi Mak Ajo Sutan Abu Bakar, Kampung Sudut Bayur Koto Tinggi Padang Pariaman.
Untuk belajar kali alua pasambahan menggunakan versi Naik Anak Mudo dalam sebuah pesta perkawinan. Naik anak mudo adalah salah satu rangkaian acara pesta perkawinan yang dilakukan sehari/semalam sebelum alek gadang dilaksanakan. Inti pembicaraan adalah memohon kepada pemuda/anak mudo untuk ikut membantu menyukseskan acara perta perkawinan tersebut. Biasanya lebih kepada rangkain acara seperti mambawakan juadah, manjalang anak daro atau marapulai, majapuik marapulai, mananti pihak penganten wanita datang, malam katangah, merias rumah, dan sebagainya. Bantuan ini bertujuan mengurangi baban barek singguluang batu tuan rumah/si Pangka.
Bentuk kegiatannya, anak mudo diundang pada malam sebelum besoknya acara berlangsung. Pimpinan pemuda ini dinamakan Kapalo Mudo. Mereka duduk bersama dalam rumah yang disuguhi carano lengkap dengan sarat-saratnya.
Pasambahan ini terbagi atas tiga sesi, Sesi 1: Mambukak parundiangan, Sesi 2: Mamasakan Siriah, dan Sesi 3: Menyampaikan maksud dan tujuan atau ujuik mukasuik.
Sesi 1: Mambukak Parundiangan
Bujang (si Pangka): Kapala mudo, sungguah pun kapalo mudo surang nan taimbau namo, nan tapuji gala, aratinyo kapado anak mudo dalam korong, urang tua samo sakali, wali korong, kapalo mudo di atehnyo. Dek karano malam lah batambah laruik, antah kok biang nan alun cabiak, antah kok rantiang nan alun patah. Dek karano ado nan takana di hati, nan tailan di mato. Nak manyalo ambo parundingan Kapalo Mudo. Nak manyabuik sado nan takana di ateh kato nan bana jalan nanluruih. Alah kadapek tu Kapalo Mudo?
Kapalo Mudo: Sampai Bujang?
Bujang: Sampai Kapalo Mudo.
Kapalo Mudo: Sapanjang kabanaran Bujang tadi, lah lurih jalan nan batampuah, lah bana kato nan basabuik, itulah kato nan sabananyo. Nan manjadi buah bana dek Bujang, dek karano hari lah batambah laruik malam, ado nan takana di hati, nan tailan di mato, andak mambaco parundiangan. Manyabuik sado nan kata, diateh kato nan bana jalan nan luruih kahapan kami. Kan baitu?
Bujang: Yo Kapalo Mudi
Kapalo Mudo: Kini baitulah Bujang. Dek tadi banyak bunyinyo. Di ateh duduak sahamparan, tagak sapamatang. Nak maelo ambo rundiangan jo kabaran, manariak kato jo mufakaik, istirahaik batiboan. Ka baa tu Bujang?
Bujang: Sampai Kapao Mudo
Kapalo Mudo: Sampai Bujang
Bujang: Sapanjang kabanaran Kapalo Mudo tadi, yo lah luruih jalan nan batampuah, lah bana kato nan babaco. Itulah kato nan sabananyo. Yo lamak makan yo dek basamo, lamak kato yo dipaiyokan. Insyallah ambo tunggu Kapalo Mudo.
(Kapalo Mudo mampalegakan kato)
Kapalo Mudo: Buyuang. Buyuang nan ambo imbau?
Buyuang: Yo Kapalo Mudo?
Kapalo Mudo: Sungguah pun Buyuang surang nan ambo imbau, aratinyo kabakeh anak mudo nan sabalah kamudiak. Apolah buah bana imbauan ambo. Dek karano hari lah batambah laruik malam. Si Pangka mandatangan parundiangan bakeh ambo. Apolah buah bana dek si Pangka. Dek karano hari alah batambah laruik. Nak manyalo nyo parundiangan kito. Andak mambaco nan takana di hati, nan tailan di mato. Di ateh kato nan bana, jalan nan luruih. Nan dek ambo, dek karano kito lai badua batigo, duduak sahamparan tagaka sapamatang, Nak mancari golek nan sagolek, picak nan salayang. Janji ambo tibokan. Iko lah nan ambo paiyokan bakeh Buyuang. Tantang kato kabajawek, rundiangan kamamulangan, ambo limpahkan bakeh Buyuang.
Buyuang: Sampai Kapalo Mudo
Kapalo Mudo: Sampai Yuang
Buyuang: Sapanjang kabaran Kapalo Mudo tadi, yo lah luruih jalan nan batampuah, lah bana bana kato nan babaco, itulah kato nan sabananyo. Lamak makan yo dek basamo, lamak kato yo di paiyokan. Nan manjadi buak bana dek Kapalo Mudo, dek karano hari lah batambah laruik malam, di Pangka madatangan parundiang bakeh Kapalo Mudo, Andak manyabauik nan takana di hati, nan tailan di mato. Di ateh kato nan bana, jalan nan luruih. Dek karano Kapalo Mudo lai baduo batigo duduak sahamparan tagak sapamatan, ikolah nan dipaiyokan bakeh ambo, kan baitu? Kini baitulah Kapalo Mudo, Dek karano tadi Kapalo Mudo maimbau tasabuik bunyinyo, andak manariak pulo ambo rundiangan jo kabaran, kato jo mufakaik. Ka baa tu Kapalo Mudo?
Kapalo Mudo: Insyallah ambo tunggu.
Buyuang: Baa dek kito nan sabalah siko. Kok bisiak lah kadangaran, kok sorak lah kalampauan. Iyo suruah kito baco?
Anak Mudo: Kok ado nan takana dihati, nan tailan dimato. Suruah bacolah, nak samo-samo kito danga. Pulangan rundiangan tu.
Buyuang: Kapalo mudo.
Kapalo Mudo: Yo Yuang
Buyuang: Tadi kato bajanji, kini kato manampati. Tadi ambo bajanji, kini ambo pulo manampati kabaa tu Kapalo Mudo?
Kapalo Mudo: Sampai Buyuang.
Buyuang: Sampai
Kapalo Mudo: Tadi kato bajanji, kini kato manampati. Dima manungga disinan bijo tumbuah, dima manggali di sinan aie datang. Tadi Buyaung bajanji, kini buyuang pula manampati. Kan lan sarancaknyo bana tu mah.
Buyuang: Kini baitulah kapalo mudo. Dek kami nan sabalah kamudiak ko. Alah ditariak kato jo mufakai, alah di elo rundiangan jo kabarana. Bulek alah buliah di golekan, picah alah buliah di layangan. Kok yo ado nan takana di hati, nan tailan di mato dek Si Pangka suruah bacolah, nak samo kito danga. Tantang kato kabajawek, rundiangan kamamulangan, bakeh Si Pangka yo batumpahan sajo bakeh ka Kapalo Mudo. Kok tatungkuik kapalo mudo, kito samo lameh, kok tatambang samo lapa. Jaweklah dek Kapalo Mudo. Sekian bana ambo Kapalo Mudo.
Kapalo Mudo:Sampai Buyuang.
Buyuang: Sampai kapalo mudo.
Kapalo Mudo: Sapanjang kabanaran Buyuan tadi, yo lah luruih jalan nan bapatampuah, lah bana kato nan babaco. Itulah kato nan sabannyo. Baa dek Buyuang. alah ditariak kato jo mufakaik, alah dielo rundiangan jo kabaran. Bulek alah buliah di golekkan, picak alah buliah dilayangkan. Alah bulek aie kapambuluhah, lah bulek kato jo mufakaik. Tantu rundiangan Si Pangka ambo pulangkan. Tapi sapatah nan dibanakan. Kok senteang minta dibilai, kok kurang minta ditukuak. Iko pulolah nan ambo banakan bakeh kapalo Buyuang.
Buyuang: Sampaikan kapalo mudo.
Kapalo Mudo: Sampai
Buyuang: Sapanjang kabaran Kapalo Mudo tadi yo lah luruih jalan nan batampuah, lah bana kato nan babaco, itulah kato nan sabananyo. Nan manjadi buah bana dek Kapalo Mudo, kok senteang minta dibilai, kok kurang minta ditukuak. Kini baitulah Kapalo Mudo. Nan dek ambo Kapalo Mudo, senteang kok lai ado kapambilai ambo bilai capek, kok kurang lai ado kapanukuak, ambo tukuak lekeh. Kok anyuik kapalo mudo, ambo sonsong capek ka ateh. Sananglah hati Kapalo Mudo tantang itu.
Kapalo Mudo: Sampai Buyuang
Buyuang: Sampai Kapalo Mudo
Kapalo Mudo: Madanga kato Buyuang tadi, yo lah sanang dalam hati, lah sajuak dalam kiro-kiro. Nan marusuah jo manggabang dek ambo yo di kato nan sapatah nan tun. Senteang kok indak bilai mambilai, kurang kok indak tukuak manukuak. Ba nan dek Buyuang, senteang kok lai ado kapambilai, babilai lakeh, kurang kok lai ado kapanukuak, batukuak lakeh. Kini tantu rundiangan Si Pangka, ambo pulangan.
Buyuang: Pulanganlah Kapalo Mudo
(Kapalo Mudo mamulangan etongan ka Si Pangka)
Kapalo Mudo: Bujang, Bujang nan ambo imbau.
Bujang: Yo Kapalo Mudo
Kapalo Mudo: Tapi sungguahpun Bujang surang nan ambo imbau aratinyo sadapek-e kapado silang nan bapangka karajo nan bapokok. Kini baitulah Bujang. Tadi kato bajanji, kini kato manampati. Bak kato Bujang juo, dima lubang ditungga, di sinan bijo tumbuah, dima sumua dikali, disanan aie datang. Aratinyo bana, tadi ambo bajanji, kini ambo pula nan manapti. Ka ba a tu Bujang.
Bujang: Sampai Kapala Mudo.
Kapalo Mudo: Sampai
Bujang: Sapanjang kabanaran Kapalo Mudo tadi, yo lah luruih jalan nan batampuah, lan bana kato nan babaco. Itulah kato nan sabananyo. Tadi kato bajanji, kini kato manapi. Tadi Kapalo Mudo nan bajanji, kini kapalo mudo lo nan manampati. Kan lah sarancak e bana tu Kapalo Mudo.
Kapalo Mudo: Kalau lah baitu kato Bujang, lah sanang dalam hati, lah sajuak dalam kiro-kiro. tantu rundiangan Bujang ambo pulangan. Kini baitulah bujang. Diawanyo tadi Bujang mandatangkan parundiangan baken ambo. A nan manjadi bana dek Bujang. Dek karano malam lah batambah laruik, antah kok biang alun cabiak, antah kok rantiang alun patang. Nak manyalo Bujang parudiangan kami, nak manyabuik sado nan takana. Di ateh jalan nan luruih, kato nan bana, kan baitu?.
Bujang: Yo
Kapalo Mudo: Alah ditariak kato jo mufakaik, alah dielo rundiangan jo kabanaran. Bulek lah buliah digolekkan, picak lah buliah dilayangkan. Lah bulek aie kapambuluhan, lah bukel kato jo mufakaik. Kak ado bana nan takana di hati, nan tailan di mato dek Bujang, sabuiklah. Nak samo kami dangan.
Bujang: Sampai Kapalo Mudo
Kapalo Mudo: Sampai
Bujang: Sapanjang kabanaran Kapalo Mudo tadi, yo lah luruih jalan nan batampuah, lah bana kato nan babaco. Itulah kato nan sabanyo. Tantu rundiangan ka ambo baco. Kini baitulah Kapalo Mudo. Bak pitua juo di nan tuo-tuo komah. Takalau tumbuah nan bak nan ko, kan batarik, bamujilih, bafie, balelo, bakurenah. A nan manjadi taratik jo mujilih. Ukua dahulu di dahuluka, ukua kudian dikudiankan. A nan manjadi fiie lelo jo kurenah. Kan baik budi karano rokok, elok baso karano siriah, indah tapian dek mudo, rami balai dek rang banyak, elok palak dek tinaman, sitinah kato disambahkan. A nan manjadi sitinah kato disambahkan. Taunjamkan lutuik nan duo, tatakua kapalo nan satu, tagenjeang tangan, tasusun jari nan sapuluah, taantaan dengan sambah. Sambah manyambah dinamokan. Ba a nan dek ambo. Tantang taratik jo mujilih, fiie, lelo jo kurenag sarato sambah lai bapakaian. Tapi tantang nan bagenjeang tangan, basusun jari nan sapuluah, batakuan kapalo nan satu, diminta dilatakkan baik-baik. Di kudian hari samo kita pakai. Kandak buliah pintak balaku, sekian bana ambo Kapalo Mudo.
Kapalo Mudo: Sampai Bujang
Bujang: Sekian Kapalo Mudo
Kapalo Mudo: Sapanjang kabanaran Bujang tadi, lah luruih jalan nan batampuah, lah bana kato basabuik, itulah kato nan sabananyo. A nan manjadi buah bana dek Bujang, takalau tumbuah nan bak nangko, kan bataratik, bamujilih, bafiie, balelo, bakurenah. Tantang taratik jo mujilih, fiie lelo jo kurenah sarato sambah lai babaokan, tapi tatantang, bagenjeang tangan, nan baunjamkan lutuik nan duo, batakua kapalo nan satu, basusun jari nan sapuluah, iko diminta di pakai di kudian hari. Kini rundiangan sajo nan ka dibaco. Kandak buliah, pinta balaku, kan baitu.
Bujang: Yoo bana Kapalo Mudo
Kapalo Mudo: Kini baitulah Bujang. Dek karano tadi tasabuik banyak bunyinyo. Dek kami lai baduo batigo di ateh duduak sahamparan tagak sapamatang. Nak manariak ambo kato jo mufakaik, maelo rundiangan jo kabanaran. Istirahat batibokan Bujang.
Bujang: Insyallah ambo tunggu Kapalo Mudo
(Kapalo Mudo mampalegakan kato)
Kapalo Mudo: Buyuag, Buyuang juo nan ambo imbau
Buyuang: Yo Kapalo Mudo
Kapalo Mudo: Sungguah pun Buyuang surang nan ambo imbau, sifaik-e kapado anak mudo nan sabalah ka ilia. Apolah buah bana nan ambo imbaukan. Si Pangkan parundiangan bakeh ambo, apolah buah bana dek si Pangka. Takalau tumbuah nan bak nangko, kan bataratik, bamujilih, bafiee balelo bakurenah, sarato sambah. Tantang taratik jo mujilih, fiie lelo jo kurenah lai nyo baokan, tapi tantang nan bagenjeang tangan, diminta dilatakkan baiak-baiak. Di kemudia hari saja samo kito pakai. Kandak buliah pintak balaku, sekian bana nan nyo laluan bakeh ambo. Nan dek ambo, dek karano kito lai baduo batigo, duduak sahamparan, tagak sapamatang. Andak maelo ambo rundiangan jo kabanaran, kato ju mufakaik, janji ambo tibokan. Nan dek si Pangka alah nyo tunggu. Ikolah nan ambo paiyokan bakeh Buyuang.Tantang rundiangan kamamulangan, kato kabajawab, ambo limpahkan bakeh Buyuang. Bapancarian lah buyuang tantang tu?
Buyuang: Sampai Kapalo Mudo?
Kapalo Mudo: Sampai Buyuan.
Buyuang: Sapanjang kabanaran Kapalo Mudo tadi, lah luruih jalan nan batampuah, lah bana kato nan babaco, itulah kato nan sabanyo. Sahandak lainyo, kato bajawek capek, rundiangan lakeh dipulangan. Tapi dek kareno Kapalo Mudo maimbau banyak bunyi-e, tantu ambo nak baiyo bamolah dulu. Nak mancari bulek nan sagolek picak nan salayang. Kaba tu Kapalo Mudo?
Kapalo Mudo: Sampai Yuang
Buyuang: Sampai Kapalo Mudo
Kapalo Mudo: Sapanjang kabanaran Buyuang tadi, lah luruih jalan nan batampuah, lah bana kato nan babaco, itulah kato nan sabanyo. Yo lamak makan yo dek basamo, lamak kati yo di paiyokan. Insyaallah ambo tunggu Yuang.
(Buyuang mampalegakan kato ka anak mudo)
Buyuang: Katik, Katik nan ambo imbau.
Katik: Yo Yuang
Buyuang: Sungguah pun Katik nan ambo imbau, aratinyo, sadapake-e kabakeh kito anak mudo nan sabalah ka ilia ko. A nan manjadi buah imbauan ambo. Si Pangka mandatangankan parundiangan bakeh Kapalo Mudo. A nan manjadi buah bana dek si Pangaka. Tantang taratik jo mujilih, fiie lelo jo kurenah sarato sambah. Tantang taratik jo mujilih, fiie lelo jo kurenah sarato sambah lai nyo lakakukan. Tapi tantang genjeang tangan, nan basusun jari nan sapuluah, iko diminta di latakkan baik-baik di kudian hari samo kito pakai. Kandak buliah pintak balaku, sekian bana di lalukan ka bakeh Kapalo Mudo. Nan dek Kapalo Mudo. Kato alun bajawek, rundiangan alun bapulangan. Janji batibokan bakeh si Pangka. Dek karano Kapalo Mudo lai baduo, batigo duduak sahamparan tagak sapamatang. Ikolah nan nyo paiyokan bakeh. Ambo. Nan dek ambo, kato alun bajawek, rundiangan alun bapulangkan, janji batibokan bakeh Kapalo Mudo. Tantang kato kabajawek, rundiangan kamamulangan, iko nan ambo paiyokan pulo bakeh Katik. Tantang kato kabajawek, rundiangan kamamulangan bakeh Kapalo Mudo, iko ambo limpahkan bakeh Katik. Sekian bana ambo Katik. Jaweklah rundiangan Kapalo Mudo tu.
Katik: Sampai Yuang.
Buyuang: Sampai Katik.
Katik: Sapanjang kabanaran Buyuang tadi, yo lah luruih jalan nan batampuah, lah bana kato nan babaco, itulah kato nan sabananyo. Bak kato buyuang juo, lamak makan yo basamo, lamak kato iyo di paiyokan. Indak ambo ulang ambo jajak-i bana kato Buyuang tadi. Ambo ulang jajak kok cupua, ambo kilie jahik kok lapeh. Ambo ulang kato kok batimbang. Kini pangkanyo sajo nan ambo ambiak. Kandak buliah, pintak balaku, tantang sambah, rundiangan sajo nan kanyo baco dek Si Pangka. Kan baitu?
Buyuang: Yo bana
Katik: Kini baitulah Buyuang, nan kato kito lah barundiang, baparan, diateh duduak sahamparan tagak sapamatang, tantu rundiang Kapalo Mudo tadi kito pulangkan. Tantang kato kabajawek, rundiangan kamamulangkan yo batumpahan sajo kabakeh Buyuah. Tatambang samo lapa, tatungkuik samo lameh. Pulangkanlah rundiangan kapalo mudo tadi.
Buyuang: Sampai Katik.
Katik: Sampai:
Buyuang: Kini baitulah Katik. Ibaraik urang mandi di pincuran. Ganti baganti. Dek karano tadi ambo alah, tantu kini Katik lo lai.
Katik: Sampai Buyuang
Buyuang: Sampai
Katik: Sapanjang kabanaran Buyuang tadi, lah luruih jalan nan batampuah, lah bana kato nan bajawab. Itulah kato nan sabanyo. Baa dek buyuang. Ibaraik urang mandi dipincuran. Ganti baganti. Dek karano tadi Buyuang alah, tantu kini ambo lo lai. Bak pantun Buyuang juo, siamang dibukik putiah, makan buah si giriang giriang, basitegang nan kunjuang putiah, bapilin indak kunjuang sariang. Tantu rundiangan Kapalo Mudo ambo pulangan. Tapi sapatah nan ambo banakan. Kok senteang minta dibilai, kurang minta ditukuak. Iko pulo mah Buyuang a..
Buyuang: Sampai Katik
Katik: Sampai.
Buyuang: Nan tacameh Katik kahanyuik, nan tagamang kajatuah. Setia manajalani, angan-angan mambaok sansai. Untuang jo manyudahi. Kok senteang minta dibilai, kok kurang minta ditukuak. Nan dek ambo Katik, kok senteang ada pambilai, ambo bilai lakeh, senteang kok ado panukuak ambo tukuak capek. Kok anyuik Buyuang kabaruah, ambo sosong capek ka ateh. Baa kok tasobok senteang kok indak ado pambilai, kurang kok indak ado panukuak, ambo tuahi sajo rundangian Katik tu. Lah kasanang hati Katik.
Katik: Sampai Yuang
Buyuang: Sampai
Katik: Mandanga kato Buyuang tadi, yo lah sanang dalam hati lah sajuak dalam kiro-kiro. Nan manjadi gusuah jo gamang dek ambo yo kato nan sapatah nantu. Singkek kok indak bilai-mambilai, kurang kok indak tukuak manukuak. Baa dek Buyuang kurang kok lai ado pambilai babailai lakeh, kurang kok lai ado panukuak batukuak lakeh. Tanti kini rundiangan Kapalo Mudo ambo pulangkan.
Buyuang: Pulanganlah Katik.
(Katik Mamulangan rundiangan ka Kapalo Mudo)
Katik: Kapalo Mudo
Kapalo Mudo: Yo
Katik: Sungguah pun Kapalo Mudo surang nan taimbau namo, sifaik-e kabakeh sado kita nan duduak sahamparan, duduak nan saparadok, makan sajamba di sidang nangko. Diawanyo tadi Kapalo Mudo mandatangkan parundiangan bakeh si Buyuang. Tapi sungguahpun Buyuang surang nan taimbau namo, nan tasabuik gala aratinyo ka kami anak mudo nan duduk sabalah ka ilia ko. Tantang kato kabajawab, rundiangan kamamulangan, di ambo bana tarabiknyo Kapalo Mudo. Ka baa tu Kapalo Mudo?
Kapalo Mudo: Sampai Katik
Katik: Sampai.
Kapalo Mudo: Sapangjang kabanaran Katik tadi yo lah luruih jalan nan batampauh, lah bana kano nan babaco, itulah kato nan sabanyo. Nan dek ambo Katik, indak bacari bana tanjuang nan babalik, lurah nan baliku. Dima katabik umpamo padi, dima katumbuah umpamo bijo, dek ambo batarimo suko Katik.
Katik: Sampai Kapalo Mudo
Kapalo Mudo: Sampai Katik
Katik: Mandanga kato Kapalo Mudo tadi, lah sanang dalam hati, lah sajuak dalam kiro-kiro tantu rundiangan kampalo mudo ambo pulangkan. Dikaji nan ba awa nan ba-akia, bamulai bakasudahan, yo di tempo awa-nyo tadi si Pangka mandatangkan parundiangan kabakeh Kapalo Mudo. Manjadi buah bana dek si Pangka, tantang sambah. Nan basusun jari nan sapuluah, batakuakan kapalo nan satu, diminta di latakkan baik-baik. Di kudian hari samo dipakai. Kandak buliah pintak balaku sekian bana di lalukannyo bakeh Kapalo Mudo. Baa nan dek Kapalo Mudo, karano lai baduo, batigo duduak sahamparan tagak sapamatang, ikolah nan di paiyokan bakeh Buyuang. Baa nan dek buyuang, iko pulalah nan dipaiyo bakeh ambo. Nan dek ambo Kapalo Mudo, ateh kami anak mudo nan sabalah ka ilia ko, alah dicari golok nan sagolek, picak nan salayang, bulek lah buliah di golekkan, picak lah buliah dilayangkan. Tantang kato kabajawek, rundiangan kamamulangan ka bakeh si Pangka, kami tumpangan sajo ka Kapalo Mudo. Nan kami, tatambang samo lapa, tatungkuik samo lameh. Sekian bana Kapalo Mudo.
Kapalo Mudo: Sampai Katik.
Katik: Sampai
Kapalo Mudo: Sapanjang kabanaran Katik tadi, lah luruih jalan nan batampuah, lah bana kato nan babaco, itulah kato nan sabanyo. Yo tempo diawa-nyo tadi si Pangka mandatanga parundiangan bakeh ambo, nan manjadi buah bana dek si Pangka tantang nan basusun jari nan sapuluah, nan batakuakan kapalo satu, diminta dilatakkan baik-baik. Kudian hari sajo kito pakai. Dek ambo mamancuang indak sakali putuih, mangauik indak sakali kameh, mangabek indak sakali arek. Bajalan nak baiyo, bakato nak bamolah, istirahaik dipintak, janji ambo tibokan. Nan dek sipangka alah nyo tunggu. Ikolah nan ambo paiyokan bakeh anak mudo sabalah ka ilia. Baa nan dek Katik, ateh namo anak mudo sabalah ka ilia, alah dicari golek nan sagolek picak nan salayang, kok boleh alah buliah digolekkan, kok picak alah buliah dilayangkan. Tantang kata kabajawek, rundiangan kamamulangan ka tumpahkan sajo bakeh ambo. Nan dek Katik tatungkuik samo lameh, tatambang samo lapa. Kan baitu?
Katik: Yooo
Kapalo Mudo: Kini baitulah Katik, tantu rundianga si Pangka ambo pulangkan, sabalum rundiangan kadipulangkan, sapatah nan ambo banakan. Kok senteang minta dibilai, kok korang minta ditukuak. Iko pulo komah Katik.
Katik: Sampai Kapalo Mudo
Kapalo Mudo: Sampai
Katik: Sapanjang kabaran Katik tadi, yo lah luruih jalan nan batampuah, lah bana kato nan babaco, itulah kato nan sabananyo. Baa rupoe dek Kapalo Mudo, nan tacameh kaanyuik, nan tagamang kajatuah, setia manjalani, angan-angan mambaok sansai, untuang juo manyudahi yo di tantang kato nan sapatah tu. Senteang minta dibilai, kurang minta ditukuak. Kan baitu Kapalo Mudo.
Kapalo Mudo: Yooo Katik
Katik: Kini baitulah Kapalo Mudo, nan dek ambo, senteang kok ado kapambilai ambo bilai capek, kurang kok ado kapanukuak ambo tukuak lakeh. Baa kok tasuo senteang kok indak ado kapambilai, kurang kok indak ado kapanukuak, ambo tuahi sajo rundiangan Kapalo Mudo tu. Sananglah hati Kapalo Mudo tantang itu.
Kapalo Mudo: Sampai Katik
Katik: Sampai Kapalo Mudo
Kapalo Mudo: Mandanga kato katik tadi lah sanang dalam hati, lah sajuak dalam kiro-kiro. Senteang kok lai ado pambilai, babilai capek, kurang kok lai ado kapanukuak batukuak lakeh. Baa kok tasuo di indak, batuahi sajo rundiangan ambo. Kan baitu Katik?
Katik: Yoo
Kapalo Mudo: Kini tantu rundiangan si Pangka ambo pulangkan.
Katik: Pulanganlah Kapalo Mudo
(Kapalo Mudo mamudalangan rundiangan bakeh si Pangka/Bujang tantang sambah)
Kapalo Mudo: Bujang, Bujang nan ambo imbau.
Bujang: Yo Kapalo Mudo
Kapalo Mudo: Sungguah pun Bujang nan ambo imbau, aratinyo radapek-e bakakeh silang nan bapangka karajo nan bapokok. A lah buah bana nan dek ambo, tadi kato bajanji, kini kato kani kato manampati. Dek karano tadi ambo nan bajanji, kini ambo pulo manampati. Kaba-a tu Bujang.
Bujang: Sampai Kapalo Mudo
Kapalo Mudo: Sekian dulu Bujang.
Bujang: Sapanjang kabanarn Kapalo Mudo Tadi lah luruih jalan nan batampuah, lah bana kato nan babaco. Baa dek Kapalo Mudo, tadi kato bajanji, kini kato manampati. Tadi Kapalo Mudo nan bajanji, kini Kapalo Mudo lo nan manampati. Bak kato Kapalo Mudo juo, dima lubang dituga, di situ bijo tumbuah, dima sumua dikali, disitu aie datang. Kan sarancak-e bana tu Kapalo Mudo.
Kapalo Mudo: Kini baitulah Bujang. Sabalum rundiangan kadipulangkan, bak pitua juo di nantuo-tuo komah Bajang, sabanyak sambuik sabanyak jawek, sabanyak kato sabanyak jawab. Antah sapantun paneh di balukan nan bukik sajo kalaunagn, nan lurah antah kapanasan. Ibaraik urang manunggu. Sabanyak lubang sabanyak cicie, tuga taasak cicia tubo, taisi tiok liang asak handaknyo. Dek lamo kok lupo, dek banyak kok ragu. Lubang sapuluah antah tajawek anam, lubang anam antah tajawek tigo, lubang tigo antah talupuik pula. Baitu pulo misanya kato Bujang tado. Rundiangan sapuluah antah tajawek anam, rundiangan anam antah tajawek tigo, rundiangan tigo antah jaweknyo sajo nan baasaian. Kaba-a pulo ko Bujang?
Bujang: Sampai Kapalo Mudo?
Kapalo Mudo: Umpamo sampai Bujang
Bujang: Sapanjang kabanaran Kapalo Mudo tadi, lah luruih jalan nan batampuah, lah bana kato nan babaco, itulha kato nan sabanayo. Baa ruponyo dek Bujang, ibaraik urang manungga. Sabanyak lubang sabanyak cicie, tugak taasak cicia tibo. Taisi tiok lubang asak handanyo. Dek banyak kok ragu, dek lamo kok lupo. Rundiangan sapuluah antah tajawek anam, rundiangan anam antah tajawek tigo, rundiangan tigo, jaweknyo sajo nan baasaian. Kan baitu?
Kapalo Mudo: Bana Bujang
Bujang: Nan dek Kapalo Mudo, rumpang sarumpun indak kabasisik bana, cabaiak samato indak kababubua bana doh Kapalo Mudo.
Kapalo Mudo: Mandanga kato Kapalo Mudo tadi lah sanang dalam hati, lah sajuak dalam kiro-kiro. Tantu rundiangan Bujang ambo pulangkan. Dikaji nan ba-awa ba-akhie, bamulai bakasudahan, yo diawanyo tadi Bujang mandatang parundiangan bakeh ambo. Apolah nan manjadi buah bana dek Bujang, tantang taratik jo mujiloh, fiie lelo jo kurenah sarato sambah lai babaokan, tapi tantang genjeang tangan nan basusun jari nan sapuluah, nan batakuakan kapalo nan satu, dipinta dilatakan elok-elok, kudian hari samo kito pakai. Pinta buliah kandak balaku, kan baitu?
Bujang: Yoo bana Kapalo Mudo
Kapalo Mudo: Baa nen ambo, dek mamancuang indak sakali putuih, mangauik indak sakali kameh, mangabek indak sakali arek. Dek ambo lai baduo batigo duduak sahamparan tagak sapamatang, mancari golek dan sagolek picak nan salayang, janji batibokan. Nan dek Bujang alah batunggu. Alah kami engongan suwok kida, alah dapek golek nan sagolek, picak nan salayang. Kok bulek lah buliah digolekkan, kok picak lah buliah dilayangkan. Alah bulek aie kapambuluhan, alah bulek kato kamufakaik. Tantang kandak Bujang nan kadibari, bak pitua urang tuo-tuo juo. Bak tambilang, bak panggali, bak nan datang, bak nan mananti. Dek karano Bujang indak mambawokannyo, tantu kamu baitu pulo.
Bujang: Sampaikan Kapalo Mudo
Kapalo Mudo: Sampai
Bujang: Sapanjang kabanaran Kapalo Mudo tadi, yo lah luruih jalan nan batampuah, lah bana kato nan babaco, itulah kato nan sabananyo. Baa dek Kapalo Mudo, bak tambilang, bak panggali, bak nan datang, bak nan mananti. Karano ambo indak mambaokan, Kapalo Mudo baitu pulo. Alah buliah kandak ambo mah Kapalo Mudo. Urang Padang mangantang banang, banang di gantang, di parampek, sudah diparampek dipatigo. Kok dirantang namuah panjang, elok dipunta naknyo singkek, singkek sado kapaguno. Bak kato urang tuo-tuo juo. Agiah-agiah kandak urang supayo dapek kandak awak. Dek karano kandak ambo alah buliah, tantu kandak kapalo mudo ambo bari pulo. Tantang ko Kapalo Mudo, bajalan baganti, bakato basudah kito tantang sambah. Kalam dipatah, karateh dicabiak, dawaik tatumpah. Istirahaik kito dulu Kapalo Mudo.
Kapalo Mudo: Insyallah
Demikian pembahasan tentang Baraja Pasambahan Sesi 1: Mambukak Parundiangan. Semoga dapat menambah pemahamannya tentang Minangkabau,. Kritik dan saran melalui kolom komentar dibawah. Save dan share artikel ini untuk berbagi pengetahuan dengan klik ikon dibawah ini.
Social Media