PASAMBAHAN MAKAN
SI PANGKA: Mak Rajo Ameh. Sungguhpun Mak Rajo Ameh surang nan taimbau, dalam sariaik jo hakikatnyo, atau di zahir dengan batinnyo, samo di dalam ampun. Ampun jo maaf di pabanyak, suko jo rela di palabiah, dek kato banyak nan salah, dek rundiang banyak nan sasek, namonyo kito basifaik gawa, Allah basifaik qadim.
Lai jo parundiangan mamak ambo jalang. Di hari sahari nangko, antah hari ko nan baik,
antah kutiko nan elok, sadang kutiko bungo kambang, anjuang balayia dimusimnyo, sau tatagak angin tibo.
Kok jamu lah datang babondong-bondong, si pokok
mananti basamo, janang manantiang sangaik suko, panawa sagalo runggo
hati.
Tumbuah sarupo iko kini, utang
dek kami Si Pangkalan, iyolah silang nan bapangka, karajo nan bapokok. Minum jo
makan basadiokan.
Jikok salorong tantang itu. Nan
bak pituah mamak juo. Adat limbago dalam
alek, mamakai Si Rajo Janang. Tasabuik Si Rajo Janang. Tahu dek ereang nan jo
gendeang, tahu di caka dengan kaik, mato
nyalang talingo nyariang, manjago labiah dengan kurang. Dek pandai janang
manatiang, tahu dek garak dengan raso, lah tadanga piriang babunyi, iyo didalam
padapuran. Alah dicaliak alah dipandang,
panuah barisi cawan pinggan, tagak badiri bujang jo janang, tangan manatiang ka
ruang selo, manatiang nasi dengan gulai. Jawek bajawek candonyo piriang, lego
balego cawan jo pinggan, bak umpamo fajar tabantang. Teko gadang mamacah ruang,
cakia ketek babilah tangan, heranlah mato mamandangi, sarupo, ombak dilautan.
Pihak kapado susunannyo, ditangah
awan bajamba, di tapi samuik bairiang, nago baroyak kiri kanan, baisi langkok
kasadonyo.
Limbak nan dari pado itu, ukuran
nasi nan katangah, jikok diinok di ranuangkan, asa bamulo dahulunyo. Padi si
Ranik Rambun Tulang, tumbuah dilereang ka
daratan, di jamua puti rambun bulan. Hari paneh jamua balingkuik, hari hujan
jamua takaka, masiak nan bukan alang kapalang, masiak dek cahayo paneh patang. Lalu
di tumbuak ka kincia, karanah bungo tanjuang, yo kalurah sungai janiah. Kalau
dicaliak candonyo kincia, aie gadang banda batombak, bak umpamo si anak roda,
bapaliang tingkah batingkah, buni alu sahut-sahutan cando tingkah talempong
jao. Jamua ditumbuak pantang basakam, diindang mako baatah, ditapih mako
badadak, putiahnyo bak putiah bak bijo limau.
Takalau maso dahulunyo, sagagam
bareh di jarang, panuah kancah jo kuali, malimbak ka dandang jo pariuak, nan
litak makan dahulu, salo manyalo nan alek nan datang, namun nasi ka usak tido.
Urang pandang ma-anik banang, lalu diparampek parampek,
sasudah tu di patigo, Jikok dirantang amuahnyo
panjang, elok dipunta nak nyo singkek, singkek ambiak sado nan paguno.
Nak ilia ka Batang Hari, Nak taruih ka Pauh Kamba, babelok jalan ka Pariaman. Minumlah aie nan
taisi, santoklah juadah nan taidang, nak sanang hati si pangkalan.
DATUEK AMEH: ...
Sumber: Berbagai Sumber
Demikian pembahasan tentang Pasambahan Makan - Bahasa dan Sastra Minangkabau (BSM). Semoga dapat menambah pemahamannya tentang Minangkabau,. Kritik dan saran melalui kolom komentar dibawah. Save dan share artikel ini untuk berbagi pengetahuan dengan klik ikon dibawah ini.
Social Media